غزہ کی تقسیم اور شمالی حصہ اسرائیل میں ضم کرنے کا منصوبہ

قاہرہ : مصری ماہر نے غزہ کی تین حصوں میں تقسیم اور شمالی حصے کو اسرائیل میں شامل کرنے کا منصوبہ بے نقاب کردیا۔ مصر کے تزویراتی ماہر اور کمانڈ اینڈ اسٹاف کالج کے مشیر میجر جنرل محمود کبیر نے دعویٰ کیا کہ اسرائیل شمالی غزہ میں نٹساریم کوریڈور تک اپنے کنٹرول کو مکمل کرنے اور علاقے کو بتدریج اسرائیل میں شامل کرنے کی کوشش کررہا ہے۔ انہوں نے کہا کہ اسرائیلی فوج غزہ میں ایک اور کوریڈور قائم کررہی ہے۔ نئے کوریڈور کا مقصد غزہ کو تین ذیلی شعبوں میں تقسیم کرنا ہے۔ شمالی سیکٹر میں بیت حنون، ام النصر، بیت لاھیا، جبالیا، المغرقہ، الزہراء اور وادی غزہ شامل ہیں۔ انہوں نے کہا کہ نیتن یاہو کا ابتدائی طور پر پوری غزہ کی پٹی کو الحاق کرنے کا ارادہ تھا تاکہ پوری پٹی اسرائیلی خودمختاری کے تحت آجائے۔ ان کا یہ مطالبہ ہے کہ شمالی غزہ سے بے گھر افراد دوبارہ اپنے کیمپوں میں واپس نہ جائیں۔