یوکرین میں ٹرین اسٹیشن پر میزائل گرنے سے 52 افراد ہلاک، متعدد زخمی

کیف : یوکرین کے شہر کراماتورسک میں ٹرین اسٹیشن پر راکٹ گرنے سے بچوں سمیت 52 افراد ہلاک اور 300 سے زائد زخمی ہوگئے۔ راکٹ اس وقت گرے جب سینکڑوں افراد نقل مکانی کرنے کی غرض سے اسٹیشن پر جمع تھے۔جائے حادثہ پر جسم کے اعضا، سامان سے بھرے بیگ اور بچوں کے کھلونے بکھرے پڑے تھے۔ ایک عینی شاہد خاتون نے بتایا کہ وہ اس وقت اسٹیشن کی عمارت میں موجود تھیں جب انہوں نے دو دھماکوں کی آواز سنی۔ خون میں لت پت زخمی اسٹیشن کے اندر آرہے تھے اور زمین پر ہر طرف لاشیں پڑی ہوئی تھیں۔ یوکرین کے صدر ولودومیر زیلنسکی نے کہا حملوں سے واضح ہے کہ برائی کی کوئی حد نہیں ہوتی۔ دوسری جانب روس نے حملے میں ملوث ہونے کی تردید کی ہے اور یوکرین پر الزام عائد کیا ہے کہ اس نے جان بوجھ کر یہ حملہ کیا ہے۔