Raza Musani 
کراچی : امامیہ اسٹوڈنٹس آرگنائزیشن پاکستان کے گولڈن جوبلی یوم تاسیس پر کراچی میں شاندار تقریب کا اہتمام کیاگیا 50 ویں یوم تاسیس کی یہ تقریب دی آئکن بینکیوئٹ، نیو رضویہ سوسائٹی میں ہوئی جس میں آئی ایس او سے تعلق رکھنے والے طلباء امامیہ، سابقین امامیہ، علمائے کرام و ملی شخصیات نے شرکت کی۔تقریب سے خصوصی خطاب میں آیت اللہ مولانا غلام عباس رئیسی نے آئی ایس او کے یوم تاسیس کی مبارکباد پیش کی اور کہا کہ شہید ڈاکٹر محمد علی نقوی رح نے 1972 میں جس شجرہ طیبہ کی بنیاد رکھی تھی الحمدللہ آج وہ شجر ایک تناور درخت بن چکا ہے اور پاکستان کو اپنے قیمتی وجود سے سیراب کر رہا ہے۔آج آئی ایس او پاکستان کا شمار فقط ایک طلبہ تنظیم کے طور پر نہیں بلکہ عالمی اسلامی تحریکوں میں ہوتا ہے، اسلامی تحریکیں آئی ایس او پاکستان سے واقف ہیں اور اسے پاکستان میں استعماری سازشوں کیخلاف نبرد آزما جوانوں کی ایک منظم تحریک کے طور پر پیش کرتی ہیں۔آئی ایس او نے اب تک لاکھوں تربیت یافتہ افراد تیار کرکے معاشرے کو دیے جو کہ آج مختلف شعبہ ہائے زندگی میں بہترین طریقہ سے ملک پاکستان کی خدمت میں مصروف عمل ہیں دیگر مقررین کا کہنا تھا ک آئی ایس او کا الہیٰ وجود مملکت اسلامی پاکستان کے لیے کسی نعمت سے کم نہیں آئی ایس او پاکستان کے تعلیمی پروجیکٹس سے آج بھی پاکستان بھر میں لاکھوں طالبعلم مستفید ہورہے ہیں، جن میں سر فہرست امامیہ بک بینک،امامیہ اسکالر شپ پروجیکٹ،امامیہ ہاسٹل پروجیکٹ و دیگر شامل ہیں، مقررین کا مزید کہنا تھا کہ نہ صرف طلباء کے مسائل بلکہ دنیا بھر میں مسلمانانِ عالم و مظلومین جہاں پر کہیں بھی ظلم ہوا آئی ایس او پاکستان نے ہمیشہ صدائے احتجاج بلند کی،یہی وجہ ہے کہ آج بھی آئی ایس او پاکستان مظلومین جہاں کے لیے ایک امید ہے۔مقررین میں سابق ڈویژن صدر آئی ایس او ڈاکٹر محمد علی، پروفیسر زاہدی، میثم عابدی، اکبر علی، نوازش رضا اور سہیل قاسم شامل تھے۔
