ویانا میں اچھے معاہدے کا انحصار امریکا کے حقیقت پسندانہ رویے اور ناجائز مطالبات سے گریز پر ہے، ایرانی وزیرخارجہ

تہران : ایران کے وزیر خارجہ حسین امیر عبداللہیان نے کہا ہے کہ تہران کی تمام ریڈ لائنوں کا خیال رکھا جائے تو ہم جوہری سمجھوتے کو آخری شکل دینے کے لیے تیار ہیں۔ حسین امیر عبداللہیان نے برطانوی ہم منصب سے ٹیلی فون پر بات چیت کی جس میں دو طرفہ تعلقات اور بین الاقوامی مسائل کے بارے میں تبادلہ خیال کیا گیا۔انہوں نے برطانیہ کی جانب سے ایرانی قرض کی ادائیگی کا خیر مقدم کرتے ہوئے امید ظاہر کی کہ بحالی اعتماد کے اقدامات انجام دے کر باہمی تعلقات کے فروغ کا راستہ ہموار کیا جاسکتا ہے۔ ویانا مذاکرات میں پیشرفت کی جانب اشارہ کرتے ہوئے ایران کے وزیر خارجہ نے یہ بات زور دے کر کہی کہ ہم حتمی سمجھوتے کے نزدیک پہنچ گئے ہیں تاہم انہوں نے واضح کیا کہ ایک اچھے معاہدے کے حصول کو یقینی بنانے کا دار و مدار امریکا کے حقیقت پسندانہ رویے اور نئے اور ناجائز مطالبات سے گریز پر منحصر ہے۔ اگر ہماری تمام ریڈ لائنوں کا خیال رکھا جائے تو تہران سمجھوتے کو حتمی شکل دینے کے لیے تیار ہے۔برطانوی وزیر خارجہ لزٹرس نے دونوں ممالک کے تعلقات میں تازہ پیشرفت پر خوشی کا اظہار کیا۔ دونوں وزرائے خارجہ نے اس ٹیلی فونک گفتگو میں ویانا مذاکرات کی تازہ ترین صورتحال کے بارے میں بھی تبادلہ خیال کیا اور حتمی سمجھوتے تک پہنچنے کی امید ظاہر کی۔