لبنان میں پیجر پھٹنے سے 9 افراد شہید، حزب اللہ کے ارکان سمیت 2750 زخمی

بیروت: اسرائیل کی سائبر دہشت گردی، لبنان میں مواصلاتی آلہ پیجر پھٹنے سے 9 افراد شہید جبکہ حزب اللہ کے ارکان سمیت 2700 سے زائد افراد زخمی ہوگئے۔ جس میں سے 200 کی حالت تشویشناک ہے. پیجر ڈیوائسز میں دھماکے جنوبی لبنان اور بیروت کے نواحی علاقوں میں ہوئے۔ حزب اللہ کا کہنا ہے کہ پیجرز کو ہیک کرکے ایک ساتھ دھماکے کئے گئے۔ عرب میڈیا کے مطابق حزب اللّٰہ کے زخمی ارکان کو اسپتال پہنچا دیا گیا، کئی کی حالت تشویش ناک ہے۔ حزب اللہ حکام کے مطابق پیجر ڈیوائسز میں دھماکے سیکیورٹی کی بڑی خلاف ورزی ہے۔ حزب اللہ کے سربراہ سید حسن نصراللہ نے کچھ عرصے قبل مجاہدین کو موبائل فون استعمال کرنے سے روک دیا تھا کیونکہ اسرائیل اس کے ذریعے اقدامات کرسکتا ہے جس کے بعد سے حزب اللہ رابطوں کے لیے پیجرز پر انحصار کرتی ہے تاکہ اسرائیل بات چیت میں رکاوٹ نہ ڈالے۔ حزب اللہ کے ذرائع کا کہنا ہے کہ مجاہدین میں پیجر کی تقسیم سے پہلے چھیڑ چھاڑ کی گئی ہوگی تاکہ ان میں دھماکے کئے جاسکیں۔ لبنان کے وزیرصحت فرس العبیاد کےمطابق دھماکوں میں 8 افراد شہید اور 2750 زخمی ہوئے جن کا 100 اسپتالوں میں علاج کیاگیا، زخمیوں میں سے 200 کی حالت تشویشناک ہے.