7 ماہ بعد عمرے اورزیارات پر عائد پابندی اٹھالی گئی

 4 اکتوبر سے صرف سعودی عرب میں مقیم افرادعمرہ ادا کرسکیں گے
جدہ (نیوز ڈیسک) سعودی عرب نے سات ماہ بعد عمرے اورزیارات پر عائد پابندی اٹھالی، عمرے کی ادائیگی، مسجد الحرام، مسجد نبوی اور روضہ مبارک کی زیارت کی اجازت تین مرحلوں میں دی جائے گی، پہلا مرحلہ اتوار 4 اکتوبر سے شروع ہوگا، یومیہ6ہزار سعودی شہری اور ملک میں مقیم غیرملکی عمرہ ادا کرسکیں گے،18اکتوبر سے دوسرے مرحلے میں یومیہ 15 ہزار سعودی شہریوں اور مقیم غیرملکیوں کو عمرہ، زیارت اور نمازوں کی اجازت ہوگی، مسجد الحرام میں40ہزارافراد نماز ادا کرسکیں گے، مسجد نبوی کی گنجائش کے 75 فیصد تک نمازیوں کو جانے کی اجازت ہوگی،یکم نومبرسے تیسرے مرحلے میں غیرملکیوں سمیت 20 ہزارافراد روزانہ عمرہ ادا کرسکیں گے، 60 ہزار افراد کو مسجد الحرام اور اسی تناسب سے مسجد نبوی میں نمازکا موقع دیا جائے گا، عمرہ، زیارات اور نمازوں کے دوران حفظان صحت کے تمام ضوابط کی پابندی کرائی جائے گی۔