Raza Musani 
رام اللہ : مغربی کنارے میں مزاحمت کاروں نے صیہونی درندگی کے جواب میں فدائی کارروائیاں تیز کردی ہیں۔ مغربی کنارے کے علاقے الخلیل میں فلسطینی مزاحمت کار کی فائرنگ سے تین اسرائیلی پولیس اہلکار ہلاک ہوگئے۔ حملہ ایک چیک پوسٹ پر کیا گیا۔ فائرنگ کے بعد حملہ آور موقع سے فرار ہوگیا جس کی تلاش کیلئے بڑے پیمانے پر سرچ آپریشن جاری ہے۔ گذشتہ روز بھی مزاحمت کاروں نے دو مقامات پر حملے کئے تھے جس میں تین صیہونی فوجی اور چار آبادکار زخمی ہوگئے تھے۔ فوجیوں نے دونوں حملہ آوروں کو گولیاں مارکر شہید کردیا تھا۔ حماس نے حملوں کو جنین۔ طوباس اور طولکرم میں آپریشن کا جواب قرار دیا ہے۔ جنین میں صیہونی فوج کی کارروائیاں جاری ہیں جہاں بڑے پیمانے پر تباہی کے باعث یہ ایک بھوت شہر میں تبدیل ہوگیا ہے۔ شہر میں وقفے وقفے سے جھڑپیں دیکھنے میں آرہی ہیں۔ گزشتہ بدھ سے اب تک ہلاکتوں کی تعداد بائیس ہو گئی ہے۔ اسرائیلی فوج کے ارکان نے کیمپ کے مکینوں پر براہ راست گولیاں اور گیس بم برسانے کے علاوہ متعدد سرکاری اور نجی املاک کو نذر آتش کردیا۔ جنین کی سڑکوں اور گلیوں کو اسرائیلی فوج نے کنکریٹ اور آہنی چادروں سے بند کر دیا ہے۔
