Raza Musani 
سان ڈیاگو: امریکی ریاست کیلیفورنیا کے شہر سان ڈیاگو میں واقع ایک مسجد پر مسلح حملے میں تین افراد جاں بحق ہوگئے۔ جبکہ دو کم عمر حملہ آوروں نے فائرنگ کے بعد خودکشی کرلی۔ سان ڈیاگو پولیس کے مطابق فائرنگ کا واقعہ اسلامی مرکز سان ڈیاگو کے باہر پیش آیا جہاں دو نوعمر حملہ آوروں نے اندھا دھند گولیاں چلائیں۔ حملے میں تین افراد جان سے گئے جن میں مسجد کا سیکیورٹی گارڈ بھی شامل ہے۔ پولیس چیف اسکاٹ واہل کا کہنا ہے کہ سیکیورٹی گارڈ نے حملہ آوروں کو روکنے کی کوشش کرتے ہوئے بہادری کا مظاہرہ کیا اور ان کے اقدامات سے مزید قیمتی جانیں بچ گئیں۔ دونوں حملہ آور بھی موقع پر مردہ پائے گئے اور ابتدائی تحقیقات کے مطابق انہوں نے خود کو گولی ماری۔ حکام کا کہنا ہے کہ واقعے کی تفتیش نفرت انگیز جرم کے زاویے سے کی جا رہی ہے۔
