سیلاب سے مزید 24 افراد جاں بحق، اموات 1314 ہوگئیں

اسلام آباد : پاکستان میں سیلاب سے مزید 24 افراد جاں بحق ہوگئے جس کے بعد اموات کی تعداد 1314 ہوگئیں۔ نیشنل ایمرجنسی آپریشن سیل کے مطابق سیلاب سے مرنے والوں میں 450 سے زائد بچے بھی شامل ہیں۔ مون سون بارشوں اور سیلاب نے ملک بھر میں تباہی اور شدید نقصان ہوا، ملک کا تقریباً ایک تہائی حصہ زیر آب آگیا جبکہ 3 کروڑ 30 لاکھ سے زائد افراد متاثر ہوئے۔ وفاقی وزیر صحت عبدالقادر پٹیل نے کہا ہے کہ سیلاب زدگان کو پانی سے پیدا ہونے والی بیماریوں، بخار اور نزلہ زکام سے بچانے اور ابتدائی طبی امداد فراہم کرنے کے لیے 20 سے زائد اضلاع میں 1200 سے زائد میڈیکل ریلیف کیمپس لگائے جارہے ہیں۔