Raza Musani 
اسلام آباد: سانحہ 9 مئی میں جناح ہاؤس پر حملے کے مرکزی مقدمہ کی تفتیش کے دوران پولیس کے پاس پیش نہ ہونے پر سابق صوبائی وزیر سمیت پی ٹی آئی کے 22 اہم رہنماؤں کو اشتہاری قرار دیدیا گیا ہے۔ اشتہاری قرار دیئے گئے رہنماؤں میں سابق صوبائی وزیر میاں اسلم اقبال، مراد سعید، عندلیب عباس، احمد نیازی، فرخ حبیب، زبیر نیازی، علی امین گنڈا پور اور حماد اظہر سمیت دیگر رہنما شامل ہیں۔ پولیس ذرائع کا کہنا ہے کہ ملزمان کو مقدمہ نمبر 96/23 میں شامل تفتیش ہونے کیلئے بار بار بلوایا گیا، طلبی کے نوٹسز کے باوجود ملزمان شامل تفتیش نہیں ہوئے۔ پولیس کے مطابق ملزمان کے گھروں، ڈیروں اور دفاتر پر بھی چھاپے مارے گئے، مگر رہنما نہیں ملے اور نہ ہی خود شامل تفتیش ہوئے ہیں۔ جس کے بعد اب عدالت سے احکامات لے کر ملزمان کو اشتہاری قرار دے دیا گیا ہے۔ ذرائع کے مطابق اب تک مجموعی طور پر پاکستان تحریک انصاف کے 282 مفرور رہنماؤں اور کارکنوں کو اشتہاری قرار دلوایا گیا ہے۔
