خضدار میں بم دھماکے سے 2 افراد جاں بحق، 3 زخمی

خضدار : صوبہ بلوچستان کے دوسرے بڑے شہر خضدار میں بم دھماکے سے دو افراد جاں بحق اور تین زخمی ہو گئے۔دھماکا سلطان روڈ دو تلوار چوک پر گاڑی میں ہوا۔دھماکا گاڑی میں نصب مقناطیسی ڈیوائس کے ذریعے کیا گیا جس کے نتیجے میں گاڑی میں سوار تاجر امان اللہ اور 20سالہ نوجوان نوید شاہوانی جاں بحق جبکہ تین افراد زخمی ہوگئے۔حملہ آوروں نے گاڑی میں سوار تاجروں کو نشانہ بنایا۔ لاش اور زخمیوں کو ڈسٹرکٹ ہیڈکواٹر ہسپتال منتقل کردیا گیا ہے جبکہ پولیس اور سیکیورٹی فورسز نے جائے وقوعہ پر پہنچ کر اسے گھیرے میں لے لیا ہے۔ ادھر وزیر اعلیٰ بلوچستان میر عبدالقدوس بزنجو نے خضدار بم دھماکے اور صحافی عبدالواحد شاہوانی کے صاحبزادے سمیت دو افراد کے جاں بحق ہونے پر دکھ اور افسوس کا اظہار کیا۔