Raza Musani 
چمن: چمن میں پاک افغان بارڈر فورسز کے مابین کشیدگی کے خاتمے اور تعلقات کی بہتری کیلئے مقامی سطح پر کوششیں شروع کردی گئی ہیں، چمن کے مقامی علماء ، عمائدین اور تاجروں پر مشتمل 16 رکنی مصالحاتی جرگہ افغانستان روانہ ہوگیاہے۔ جرگہ ارکان امن محبت اور دوستی کا پیغام لےکر طالبان کے سپریم کمانڈر ملا ہیبت اللہ اخوند کے نمائندہ وفد اور گورنر قندھار سمیت اہم سرکاری حکام سے ملاقاتیں کریں گے، امن دوستی اور تعلقات کی بہتری کی یہ کوششیں گزشتہ دنوں کور کمانڈر 12 کور کوئٹہ جنرل آصف غفور کے دورہ چمن کے موقع پر عمائدین سے ملاقات کے دوران کی گئیں، چمن کے مقامی علماء، قبائل اور تاجروں نے مطالبہ کیا تھا کہ افغانستان میں طالبان کی عبوری حکومت کے ساتھ سرحدی مسائل پر بڑھتی کشیدگی کو ختم کرنے کیلئے ماضی کی طرح روایتی جرگہ کو افغانستان جاکر مسائل حل کرنے کی حمایت کی جائے۔
