یمنی ڈرونز کے بعد ریمورٹ کشتیاں،سعودی حکام میں ہلچل

 بارودی کشتی سے سعودی عرب کی یانبو بندرگاہ پر حملہ،ساحل پر دھماکے سے دھوئیں کے سیاہ بادل، کمرشل ٹریفک متاثر ،بحری جہاز کو نقصان پہنچنے کی اطلاع
دو دن میں ملک خالد ایئربیس پر ڈرون طیاروں سے دوحملے، کارروائیاں سعودی جارحیتوں اور محاصرے کا جواب ہیں،یمنی فوج،مارب کا سقوط قریب آگیا
ریاض /صنعا(نیوز ڈیسک) بارود سے بھری ریموٹ کنٹرول کشتی سے سعودی عرب کی یانبو بندرگاہ پر حملہ کیا گیا،جس کے بعد ساحل پر دھماکے سے سیاہ دھوئیں کے بادل چھا گئے، سعودی عرب کا دعوی ہے کہ کشتی کو راستے ہی میں روک کر تباہ کر دیا تھا، بندرگاہ کے قریب پیش آنے والے واقعے سے کمرشل ٹریفک متاثر ہوئی ہے،نجی سیکیورٹی ایجنسی کا کہنا ہے کہ حملہ ایک بحری جہاز پر کیا گیا جس سے نقصان پہنچا، ادھریمن کی فوج اور رضاکار فورس کے ڈرونزنے ایک دن بعد دوبارہ جنوبی سعودی عرب کے علاقے خمیس مشیط میں ملک خالد ایئربیس کوقاصف کے ڈرون طیاروں سے حملوں کا نشانہ بنایا، اس حملے سے ایک دن پہلے بھی ملک خالد ایئربیس کو اپنے حملوں کا نشانہ بنایا گیا تھا، یمن کی مسلح افواج کے ترجمان یحیی سریع نے کہا ہے کہ یہ کارروائیاں سعودی جارحیتوں اور محاصرے کا جواب ہیں اور یہ یمن کے قانونی اور جائز حق کے دائرے میں کی جا رہی ہیں،ادھریمن کی فوج اور رضاکارفورس نے مآرب کی جانب اپنی پیشقدمی جاری رکھتے ہوئے اہم فوجی اڈے کو اپنے کنٹرول میں لے لیا ،لڑائی کے دوران جنگجوں نے ہتھیار ڈال دیئے اور خود کو یمنی فوج کے حوالے کردیا، یمنی فوج الطلعہ الحمرا اور اس کے اطراف کے ٹیلوں پر کنٹرول حاصل کرنے کے بعد الجفینہ کے علاقے کی جانب پیشقدمی کر رہی ہے اور الطلعہ الحمرا کے علاقے میں منصورہادی کے جنگجوﺅں کی شکست کے بعد یمنی فوج کے لئے کئی راستوں سے مآرب کی جانب بڑھنے کا راستہ ہموار ہوگیا ہے یمنی فورسز شہر مآرب کے نہایت قریب پہنچ چکی ہیں اور اب صرف چند کلومیٹر کا فاصلہ باقی ہے ۔