ظالم کے مقابل استقامت اور مزاحمت نے صیہونیوں کو گھٹنے ٹیکنے پر مجبور کر دیا۔ حماس، القدس بریگیڈ اور دیگر مجاہدین کے ہاتھوں غاصب اسرائیل کی شکست کے بعد صیہونی حکومت نے گھٹنے ٹیکتے ہوئے جنگ بندی کا اعلان کر دیا ہے جس کے بعد فلسطین کے مختلف علاقوں میں جشن کا سماں ہے ۔ اسرائيل کے ٹی وی چینل -12 نے بتایا ہے کہ جنگ بندی پر دو بجے سے عمل در آمد شروع ہو گيا۔ صیہونی کابینہ نے بھی ایک بیان جاری کرکے ، گیارہ دنوں کی جارحیت کے بعد جنگ بندی کی خبروں کی تصدیق کی ہے لیکن اس بات پر زور دیا تھا کہ جنگ بندی پر عمل در آمد کے وقت کا تعین نہیں کیا گيا ہے ۔
حماس نے بتایا ہے کہ مصر نے جمعہ کی صبح دو بجے سے جنگ بندی پر عمل در آمد کی اطلاع دی ہے ۔ حماس نے کہا ہے کہ جب تک صیہونی حکومت ، جنگ بندی پر عمل کرے گی ، ہم بھی پر اس کی پابندی کريں گے ۔ اسلامی جہاد تحریک کی فوجی شاخ القدس بریگيڈ کے ترجمان نے بھی کہا ہے کہ جنگ بندی کی ہم پابندی کريں گے لیکن دشمن کے ہر حملے کا ٹھوس جواب دیں گے ۔ انہوں نے کہا کہ ہمارے مجاہدوں کی انگلیاں ٹریگر پر ہیں اور آخری بات ہمیشہ استقامت کی ہوگي اور اگر دشمن نے پھر حملے شروع کئے تو ہم بھی پھر سے حملے شروع کر دیں گے ۔
ادھر غرب اردن میں رات سے ہی فلسطنییوں نے فتح کے جشن کا آغاز کر دیا ۔ فلسطینی ذرائع کے مطابق ، غرب اردن کے مختلف شہروں میں لوگوں نے سڑکوں پر نکل کر فلسطین کی جیت کی خوشی منائي ۔
خبروں کے مطابق مصر ، جنگ بندی پر نظر رکھنے کے لئے دو وفود بھیجے گا ۔
