حماس کو روک نہیں سکے،حزب اللہ سے کیسے لڑیں گے،

متحدہ اسلامی مزاحمتی محاذ اسرائیلی حکومت کو ختم کر دینے کی طاقت رکھتا ہے ،صیہونی کمانڈر
تل ابیب(نیوز ڈیسک) اسرائیل ریزرو فورس کے سابق کمانڈر و اسرائیل ڈیفنس فورس کے محتسب بریگیڈیئر جنرل آئزک برک نے کہاہے کہ اگر ہم 11 ایام پر مشتمل راکٹ باری کو روکنے کی صلاحیت نہیں رکھتے تو پھر کئی محاذوں سے بیک وقت لڑی جانے والی جنگ جس میں حزب اللہ بھی شریک ہو گی، میں کیا کریں گے ،اسرائیلی ریڈیو سے انٹرویو میں انہوں نے کہا ہے کہ متحدہ اسلامی مزاحمتی محاذ اسرائیلی حکومت کو ختم کر دینے کی طاقت رکھتے ہیں کیونکہ ممکن ہے کہ شیعہ عسکری قوتیں بھی ان سے آ ملیں اور اس کے بعد مقبوضہ فلسطین میں حقیقی تباہی ہو گی جبکہ اس وقت ہمارے پاس ان کا مقابلہ کرنے کی طاقت بھی ہرگز نہ ہو گی ، صیہونی فوج صرف اور صرف اپنی فضائیہ کی مدد سے ہی بالادستی کے ساتھ جنگ لڑ سکتی ہے ، صیہونی جنرل کا کہنا تھا کہ ممکنہ کسی بھی وسیع جنگ میں اسرائیل کے اندرونی محاذ ہی لڑائی کے اصلی میدان میں بدلیں گے ،جب لاکھوں یہودی آبادکار ایک لمبے عرصے کے لئے انتہائی درستگی کے ساتھ نشانے کے عین اوپر لگنے والے میزائلوں اور خودکش ڈرون طیاروں کی زد پر ہوں گے ، اس وقت کوئی اسرائیل میں زندگی گزارنے کی طاقت رکھتا ہو گا اور نہ ہی کوئی کمانڈر "حماس پر فتح یابی” سے متعلق دعویٰ ہی کر سکے گا۔