اسلامک آزاد یونیورسٹی تہران اور اقرا یونیورسٹی کے درمیان تعاون کا معاہدہ

کراچی: ایران کے قونصل جنرل حسن نوریان کی موجودگی میں اسلامی آزاد اور اقرا یونیورسٹی کے اعلیٰ حکام نے تعاون کی ایک یادداشت پر دستخط کئے۔ تقریب اقرا یونیورسٹی کی مرکزی عمارت میں منعقد ہوئی اور اقرا یونیورسٹی کے صدر ڈاکٹر وسیم غازی اور اسلامی آزاد یونیورسٹی کے بین الاقوامی نائب صدر ڈاکٹر جلال درخشہ نے تعاون کے معاہدے پر دستخط کئے۔ اس تقریب میں مشہد اور زاہدان آزاد یونیورسٹیوں کے حکام، جو ان صوبوں کے دیگر شہروں میں آزاد یونیورسٹیوں کی مختلف شاخوں کے سربراہ بھی تھے سمیت ایرانی قونصل جنرل حسن نوریان اور ایرانی وفد کے اراکین سمیت خانہ فرہنگ کراچی کے ڈائریکٹر سعید طالبی بھی شریک تھے۔
کراچی میں دونوں یونیورسٹیوں کے درمیان مفاہمت کی یادداشت پر دستخط کا مقصد پروفیسرز اور طلبہ کے تبادلے، تربیتی کورسز کا انعقاد، مطالعہ کے مواقع، طلبہ کے دوروں کا انعقاد اور سائنسی و تحقیقی تعاون ہے۔ اس موقع پر خطاب کرتے ہوئے کراچی میں تعینات ایران کے قونصل جنرل حسن نوریان نے کہا کہ ہم ایران اور پاکستان بالخصوص صوبہ سندھ کے درمیان سائنسی اور علمی تعلقات کی ترقی کے لئے دستیاب صلاحیتوں کو بروئے کار لانے کے لئے پرعزم ہیں، امید ہے کہ اس شراکت داری سے اقراء یونیورسٹی اور اسلامک آزاد یونیورسٹی ایران میں سائنسی روابط اور تحقیقی اقدامات میں تیزی آئے گی اور اس تعاون سے دونوں یونیورسٹیوں کو بین الاقوامی یونیورسٹیوں کی عالمی درجہ بندی کی سیڑھی کو آگے بڑھانے میں مدد مل سکے گی۔