اسرائیل کا کوئی مستقبل نہیں ، ہر صورت مٹ کر رہے گا، سید حسن نصراللہ

فلسطینی عوام اپنے حق کے حصول کیلئے ڈٹے ہوئے ہیں ،امتِ مسلمہ کو چاہئے کہ وہ فلسطینی امنگوں پراپنے موقف کو مکمل سچائی اور بہادری کے ساتھ بیان کرے
فلسطینی قوم نے مزاحمتی محاذ کے حوالے سے اپنا اٹل موقف کھل کر بیان کر دیا ہے، غاصب صہیونیوں کے ساتھ سازباز سے مزاحمت پر کوئی اثرنہیں پڑے گا
بیروت (نیوز ڈیسک) حزب اللہ کے سیکریٹری جنرل سید حسن نصراللہ نے کہا ہے کہ غاصب صہیونی حکومت کا کوئی مستقبل نہیں اور یہ ہر صورت صفحہ ہستی سے مٹنے والی ہے، امتِ مسلمہ کو چاہئے کہ وہ فلسطینی امنگوں کے حوالے سے اپنے موقف کو مکمل سچائی اور بہادری کے ساتھ بیان کرے، عالمی یوم القدس کے موقع پر خصوصی خطاب میں سید حسن نصراللہ نے کہا کہ ہم فلسطینی جوانوں کو قیام کرتے ہوئے دیکھتے ہیں اورآج پوری فلسطینی قوم نے مسئلہ فلسطین اور اسلامی مزاحمتی محاذ کے حوالے سے اپنے اٹل موقف کو کھل کر بیان کر دیا ہے،حالیہ واقعات نے ثابت کر دیا ہے کہ فلسطینی عوام اپنے حق کے حصول کے لئے ڈٹے ہوئے ہیں یہ مسئلہ فلسطینیوں کی مدد کے حوالے سے امتِ مسلمہ کی سنگین ذمہ داری کو مزید بھاری بنا رہا ہے،انہوں نے کہا کہ ڈونلڈ ٹرمپ اور خطے میں اس کے چیلوں کی حکومت کا خاتمہ اور صدی کی ڈیل کی کھلی شکست خطے میں وقوع پذیر ہونے والے اہم واقعات میں سے ہیں ،آج خطے کی نئی صورتحال اور دشمن کی جانب سے شکست اور بند گلی میں پہنچ جانے کا اعتراف ان عوامل میں سے ہے جن کے بعد اب ہمیں اپنے پورے وجود کے ساتھ یہ محسوس کر لینا چاہئے کہ قدس کی آزادی نزدیک ہے، سید حسن نصراللہ نے مختلف اسلامی عرب ممالک کی جانب سے اسرائیل سے دوستی کے اعلانات کی جانب اشارہ کرتے ہوئے کہا کہ دشمن کے ساتھ سازباز، مزاحمتی محاذ کی آواز کے بلند تر ہونے کا باعث ہے ،غاصب صہیونیوں کے ساتھ سازباز سے مزاحمت پر کوئی اثرنہیں پڑے گا۔