ترکی کے شہر اناتالیہ میں منعقد ہونے والی چوتھی اسپیکر کانفرنس میں مقبوضہ جموں وکشمیر تنازعہ کا اقوام متحدہ کی سلامتی کونسل کی قراردادوں کے مطابق حل پر اتفاق کیا گیا ہے۔
کانفرنس میں افغانستان، چین، ایران، عراق، پاکستان، روس اور ترکی کی پارلیمنٹس کے اسپیکرز نے اپنے اپنے پارلیمانی وفود کے ہمراہ شرکت کی۔ اسپیکر اسد قیصر کی تجویز پر کانفرنس میں تمام ریاستوں کو فنانشل ایکشن ٹاسک فورس (ایف اے ٹی ایف) کی سیاست سے گریز کرنے کی ضرورت پر بھی زور دیا گیا، اس حکمت عملی کے تحت بھارت پاکستان کے خلاف مستقل طور پر کام کرتا ہے۔ اناتالیہ اعلامیے میں پاکستان کی تجویز بھی منظور کی گئی ہے کہ ترقی پذیر ممالک کے عوام کے لئے کووڈ 19 ویکسینوں کو سستی بنائی جانی چاہئے تاکہ حفاظتی ٹیکوں تک کمزور طبقات کی رسائی کو یقینی بنایا جاسکے۔ پاکستان کے قومی اسمبلی کے اسپیکر اسد قیصر نے 24-25 مارچ 2021 کو ترکی کے شہر انتالیا میں “دہشتگردی کے خلاف جنگ اور علاقائی رابطے کو مضبوط بنانے” کے سلسلے میں چوتھی اسپیکر کانفرنس میں شرکت کے لئے پارلیمانی وفد کی قیادت کی۔ وفد میں قومی اسمبلی اور سینیٹ کے ممبران شامل تھے۔
چوتھی اسپیکر کانفرنس نے بھی اتفاق رائے کے ذریعے اناتالیہ اعلامیہ منظور کیا، جس میں اس بات کا اعادہ کیا گیا کہ پارلیمنٹ میں باہمی تعاون سے بات چیت کے لیے چینلز قائم ہونے چاہیے جو امن ، سلامتی اور ترقی میں اہم کردار ادا کرتے ہیں۔
اناتالیہ اعلامیے میں یہ بھی نوٹ کیا گیا ہے کہ عالمی اور علاقائی امن و استحکام کو یقینی بنانے کے لئے ، جموں و کشمیر تنازعہ سمیت خطے کے تمام امور ، اقوام متحدہ کے متعلقہ قراردادوں کے مطابق حل کرنے کی ضرورت ہے۔کانفرنس میں اسپیکر اسد قیصر نے اپنے خطاب میں کہا کہ رابطہ علاقائی اتحاد اور تعاون کا سنگ بنیاد ہے۔اس تناظر میں، انہوں نے خطے میں موجود متعدد مواقع کی طرف توجہ مبذول کروائی جو علاقائی رابطے کو مستحکم کرنے کے ذریعے فوائد حاصل کرسکیں گے۔ انہوں نے دنیا بھر میں بڑھتی ہوئی غذائی قلت، اسلامو فوبیا، امتیازی سلوک اور عدم رواداری پر اپنے خدشات کا بھی ذکر کیا۔کانفرنس کے موقع پر، پاکستان کے پارلیمانی وفد نے ترکی، افغانستان اور عراق کے پارلیمانی وفود کے ساتھ بھی ملاقاتیں کیں، جس میں علاقائی تعاون اور انضمام کو فروغ دینے کے اقدامات پر تبادلہ خیال کیا گیا۔
