مقبوضہ فلسطین میں صیہونیوں پر عرصہ حیات تنگ کردیا،حماس

، نتن یاہو آگ سے کھیلنے کی کوشش نہ کرے اور جب تک ہم مسجد الاقصی اور بیت المقدس کو آزاد نہیں کرا لیتے چین سے نہیں بیٹھیں گے،اسماعیل ہنیہ
اسرائیل کومسجد الاقصی سے صیہونیوں کا انخلا، شیخ جراح سے فلسطینیوں کا اخراج روکنا اور حملے بند کرنے کے مطالبات کو تسلیم کرنا ہوگا،خالد مشعل
غزہ(نیوز ڈیسک) حماس کے سربراہ اسماعیل ہنیہ نے کہا ہے کہ غزہ، گذشتہ پندرہ برسوں سے شدید محاصرے میں رہا ہے مگر اب اس نے مقبوضہ فلسطین کے شہروں میں صیہونیوں کے لئے عرصہ حیات تنگ کردیا ہے اور صیہونیوں کے زیرقبضہ شہروں میں ہو کا عالم ہے اور استقامتی محاذ کے جوابی میزائلی اور راکٹ حملوں کے باعث غاصب صیہونی اپنے اپنے گھروں اور پناہ گاہوں میں قید ہو کر رہ گئے ہیں ، نتن یاہو آگ سے کھیلنے کی کوشش نہ کرے اور جب تک ہم مسجد الاقصی اور بیت المقدس کو آزاد نہیں کرا لیتے اس وقت تک چین سے نہیں بیٹھیں گے، حماس کے بیرونی امور کے دفتر کے سربراہ خالد مشعل نے غاصب صیہونی حکومت کے ساتھ کسی بھی طرح کی فائر بندی کو مشروط قرار دیا ہے، مسجد الاقصی سے غاصب صیہونیوں کے انخلا، فلسطینیوں کو مسجد میں جانے کی آزادی، شیخ جراح سے فلسطینیوں کے اخراج کو روکنا، حال ہی میں گرفتار کئے گئے فلسطینیوں کی رہائی اور غزہ پر حملے بند کرنے کے مطالبات کو جنگ بندی کے لئے غاصب صیہونی حکومت کو بہرحال تسلیم کرنا ہو گا، حماس نے مصالحت کاروں پر واضح کر دیا ہے کہ سب سے پہلے جارحیت بند ہونا ضروری ہے۔