معاہدہ ابراہیم سعودی کوششوں کا نتیجہ، امریکا بھی معترف

اسرائیل سے تعلقات کیلئے عرب ممالک کی کوششوں کے مخالف نہیں ، معاہدے سے فلسطینیوں اوراسرائیلیوں کو مذاکرات کی میز پر واپس لانے میں مدد مل سکتی ہے،سعودی وزیرخارجہ
معاہدہ ابراہیم کیلئے سعودی کوششوں کا خیرمقدم کرتے ہیں ، سعودی عرب اسرائیل کو تسلیم کرلے جس سے دوسرے خلیجی ممالک کو بھی تعلقات قائم کرنے میں آسانی ہوگی،امریکی وزیرخارجہ

واشنگٹن(نیوز ڈیسک) سعودی وزیر خارجہ فیصل بن فرحان نے اعتراف کیا ہے کہ ریاض، تل ابیب کے ساتھ تعلقات قائم کرنے کی عرب ممالک کی کوششوں کا مخالف نہیں ، ایک انٹرویو میں سعودی وزیرخارجہ نے کہا کہ ریاض، اسرائیل کے ساتھ عرب ممالک کے تعلقات قائم کرنے کی مخالفت میں کوئی قدم اٹھانے کا ارادہ نہیں رکھتا، ایک سوال پر شہزادہ فیصل نے کہا کہ عرب امارات اور بحرین کے اسرائیل کے ساتھ معاہدوں سے فلسطینیوں اوراسرائیلیوں کو مذاکرات کی میز پر واپس لانے کیلئے بنیادی نوعیت کے کام میں مدد مل سکتی ہے، سب سے اہم اور مقدم کام یہ ہے کہ ان دونوں فریقوں کو دوبارہ مذاکرات کی میز پر لایا جائے، اس سے پہلے امریکی وزیر خارجہ مائیک پومپیو نے سعودی ہم منصب شہزادہ فیصل سے ملاقات میں متحدہ عرب امارات اور بحرین کے اسرائیل کے ساتھ معاہدے کی کامیابی میں سعودی حکام کی کوششوں پر اظہار تشکر کیا، اور زور دیا کہ سعودی عرب بھی اسرائیل کو تسلیم کرلے جس سے دیگر خلیجی ممالک کو بھی اسرائیل سے تعلقات قائم کرنے میں آسانی ہوگی، ہمارا مشترکہ مقصد خطے میں امن و سلامتی ہے