کینیڈا : مسلم خاندان کو شہید کرنیوالے صیہونی نوجوان پر دہشت گردی کی فرد جرم عائد

اونٹاریو : کینیڈا کی ریاست اونٹاریو کے شہر لندن میں مسلمان خاندان پر گاڑی چڑھا کر4افراد کو شہید کرنے والے صیہونی دہشت گرد پر دہشت گردی کی فرد جرم عائد کر دی گئی ہے۔ پراسیکیوشن کا کہنا ہے کہ نیتھینئیل ویلٹمین پر فرسٹ ڈگری اقدام قتل کے 4الزامات دہشت گردی کے زمرے میں آتے ہیں اور یہ کہ پراسیکیوشن نے کینیڈا کے کریمینل کوڈ کے تحت ہی فرد جرم کی نوعیت مزید سنگین کر دی ہے۔ پولیس نے الزام عائد کیا ہے کہ یہ واقعہ مسلمانوں پر حملے کا سوچا سمجھا منصوبہ تھا۔ ویلٹمین کو دہشت گردانہ سرگرمی سے منسلک اقدام قتل کے ایک الزام کا بھی سامنا ہے۔ فرد جرم کو ایک ایسے موقع پر سنگین بنایا گیا ہے جب حملے کا مبینہ ملزم ویلٹمین پیر کی صبح وڈیو لنک کے ذریعے عدالت کے سامنے پیش ہوا۔
46 سالہ سلمان افضل، ان کی 44 سالہ بیوی مدیحہ سلمان، 15 سالہ بیٹی یمنی اور 74 سالہ طلعت افضل کو 6 جون کو اس وقت گاڑی کے نیچے کچل کر قتل کر دیا گیا تھا جب وہ شام کو چہل قدمی کر رہے تھے۔سلمان افضل کا 9 سالہ بیٹا فائز اس حملے میں شدید زخمی ہو گیا تھا اور توقع کی جا رہی ہے کہ اس کی زندگی خطرے سے باہر ہو گئی ہے۔ مقتول خاندان کے احباب نے کہا ہے کہ الزامات کو اپ گریڈ کر کے اس کو اقدام دہشت گردی کے تحت لانا ایک صحیح فیصلہ ہے۔