افغان مفاہمتی کونسل کےچیئرمین ڈاکٹر عبداللہ عبداللہ انتہائی اہم دورے پر پاکستان پہنچ گئے ہیں۔ مشیرتجارت عبدالرزاق داؤد نے اسلام آباد ایئرپورٹ پر ان کا استقبال کیا۔ عبداللہ عبداللہ وزیراعظم، صدر مملکت سمیت وزیرخارجہ شاہ محمود قریشی اور دیگر اعلیٰ حکام سے ملاقاتیں کریں گے۔ ڈاکٹر عبداللہ عبداللہ انسٹی ٹیوٹ آف اسٹریٹجک اسٹڈیز سے بھی خطاب کریں گے۔ افغان مفاہمتی کونسل کے چیئرمین 3 روزہ دورے پر پاکستان آئے ہیں۔ ان کے دورے میں افغان امن عمل کے تناظر میں بات ہوگی اور دو طرفہ تعلقات اور عوامی سطح پر روابط مستحکم بنانے پر تبادلہ خیال کیا جائے گا۔
عبداللّٰہ عبداللّٰہ کے ہمراہ اسلام آباد آنے والے وفد میں افغان مفاہمتی کونسل کے اہم ارکان بھی شامل ہیں۔ اسپیکر قومی اسمبلی اور چیئرمین سینیٹ سے ملاقات بھی ڈاکٹر عبداللّٰہ عبداللّہ کے شیڈول کا حصہ ہیں۔ پاکستان روانگی سے قبل انہوں نے ٹویٹ کیا کہ اس دورے سے دونوں فریقین کو دوحہ میں ہونے والے افغانستان امن مذاکرات اور دوطرفہ تعلقات پر تبادلہ خیال کرنے کا موقع ملے گا۔ انہوں نے لکھا مجھے امید ہے کہ اس دورے سے ہر سطح پر باہمی تعاون کے ایک نئے باب کا آغاز ہوگا۔
