کورونا وائرس کے پھیلاؤ کے خدشات کے پیش نظر پشاور کے مزید پانچ علاقوں میں اسمارٹ لاک ڈاؤن لگانے کا نوٹیفیکیشن جاری کر دیا گیا ہے۔ تفصیلات کے مطابق ڈپٹی کمشنر پشاور محمد علی اصغر کی جانب سے جاری کردہ نوٹیفیکیشن کے مطابق صوبائی دارلحکومت کے مزید علاقوں میں آج دوپہر 2 بجے سے اسمارٹ لاک ڈاؤن نافذ ہو گا جس کا مقصد کورونا کے پھیلاؤ کو روکنا ہے۔ ان علاقوں میں حیات آباد، صدر، ڈیفینس کالونی، پجگی روڈ اور ورسک روڈ شامل ہیں۔ اعلامیہ کے مطابق اسمارٹ لاک ڈاؤن کے دوران ان علاقوں سے ان آؤٹ انٹری بند رہے گی۔ حکام کا کہنا ہے کہ ان علاقوں میں کورونا وائرس کے کیسز رپورٹ ہونے کی وجہ سے اسمارٹ لاک ڈاؤن لگایا گیا ہے، لاک ڈاؤن کے دوران صرف ضروری اشیاء خوردونوش، میڈیسن، جنرل اسٹور، تندور اور ایمرجنسی سروس کی دکانیں کھلی رہیں گی اور مساجد میں صرف 5 افراد کو باجماعت نماز پڑھنے کی اجازت ہوگی۔
