مقبوضہ کشمیر کے بڈگام، گنڈ حسی بٹ اور سرینگر کے مرکزی جلوسوں پر قابض بھارتی افواج نے بدستور پابندی عائد کی۔ 8 محرم الحرام کو شہر کے سول لائنز علاقوں بشمول لال چوک اور بڈشاہ چوک کی مکمل ناکہ بندی کے باوجود کئی مقامات سے تعزیہ کے جلوس برآمد کرنے کی کوشش کی گئی، جس دوران 30 کے قریب عزاداروں کو حراست میں لیا گیا۔ شہر سرینگر کے پائین علاقوں کو سول لائنز علاقوں سے ملانے والی سڑکوں کو بند کیا گیا تھا۔ کسی بھی گاڑی کو شہر کے اندرونی علاقوں سے لالچوک، ڈلگیٹ، یا بٹہ مالو کی طرف جانے کی اجازت نہیں دی گئی۔ قابض فورسز نے ڈلگیٹ میں واقع حیدریہ ہال جہاں ماتمی جلوس کو اختتام پذیر ہونا تھا، کی طرف جانے والی سڑکوں کو خاردار تاروں سے سیل کر دیا تھا۔ سخت ترین بندشوں کے باوجود جلوس عزاء برآمد کرنے کی کوشش کی گئی، لیکن پولیس نے عزاداروں کا راستہ روکا، جس دوران کئی عزاداروں کو حراست میں لیا گیا۔
عزاداروں نے ڈلگیٹ کی طرف پیش قدمی کرنے کی کوشش کی، تاہم پولیس یہاں پر گرفتاریاں عمل میں لائی۔ وومنز کالج کے نزدیک بھی چند عزادار جمع ہوئے اور نعرے لگائے، تاہم وہ بعد میں منتشر ہوگئے۔ یہاں نصف درجن کے قریب عزاداروں کو گرفتار کیا گیا۔ نماز جمعہ کے بعد ڈلگیٹ سے بھی ماتمی جلوس برآمد کرنے کی کوشش کی گئی، تاہم پولیس نے اس کو ناکام بناتے ہوئے کئی ایک عزاداروں کو گرفتار کر لیا۔ اس سے قبل گنڈ حسی بٹ اور بڈگام میں عزاداروں نے آزادی کے حق میں فلک شگاف نعرے لگائے۔ قابض فورسز نے عزاداروں پر شیلنگ اور آنسو گیس کا بے تحاشہ استعمال کیا اور گنڈ حسی بٹ میں عزاداروں کو گرفتار کرکے ان پر کالے قوانین کا نفاذ بھی عمل میں لایا گیا۔
