فتح تک مزاحمت،بحرین میں تحریک کی 10سالگرہ پر مظاہر ے

 مناما سمیت مختلف شہروں اور نواحی علاقوں میں پوسٹر، شہدااور علما کی تصاویر اٹھائے شہری سڑکوں پر نکل آئے، مظاہرین کااپنے اپنے علاقوں میں مارچ
 ظلم و ستم کے باوجود عوام عزت و آزادی کی راہ بدستور جاری رکھیں گے، آیت اللہ شیخ عیسی قاسم،ظلم کا مقابلہ کرنے سے پیچھے نہیں ہٹیں گے، النجبا موومنٹ
مناما (نیوز ڈیسک) بحرین میں عوامی تحریک کو 10سال مکمل ہونے پر ملک بھر میں احتجاجی مظاہرے کئے گئے ، مناما سمیت مختلف شہروں اور نواحی علاقوں میں پوسٹر، شہدااور علما کی تصاویر اٹھائے شہریوں کی بڑی تعداد سڑکوں پر نکل آئی ،مظاہرین نے اپنے اپنے علاقوں میں مارچ کیا اور آل خلیفہ حکومت کے خلاف نعرے لگائے، مظاہرین ایسے پلے کارڈ اٹھائے ہوئے تھے جن پر ” کامیابی تک استقامت جاری رہے گی ، تعلقات کی بحالی منظور نہیں“ اور ”ہم شہیدوں کے خاندانوں کے شکرگزار ہیں“ ، جیسے نعرے درج تھے، بحرین میں 14 فروری 2011 سے آل خلیفہ حکومت کے خلاف عوامی تحریک کا آغاز ہوا تھا جو پوری شدت سے جاری ہے، اس دوران11ہزار سے زیادہ باشندوں کو بے بنیاد الزامات عائد کرکے گرفتار کیا گیا ہے اور متعدد افراد کی شہریت چھین لی گئی ،حکومت نے کورونا کی آڑ لیکر 11فروری سے مسجدوں میں نمازجماعت اور مذہبی پروگراموں کے انعقاد پر پابندی لگادی تھی، اسلامی تحریک کے رہنما آیت اللہ شیخ عیسی قاسم نے تحریک کو دس سال پورے ہونے پر قم میں منعقدہ تقریب میں کہا کہ مظلوموں کو کچلے جانے اور ان پر ظلم و ستم روا رکھنے کے باوجود عوام عزت و آزادی کی اپنی راہ بدستور جاری رکھیں گے ، ماضی میں بحرین میں سیاسی طرز حکومت رجعت پسندانہ اور ظالمانہ رہا ہے اور اس کا بحرین کی عظیم قوم سے کوئی تعلق نہیں ہے ، تشدد اور ایذا رسانی اور عوام کی سرکوبی کے لئے بیرونی طاقتوں سے مدد لینے کے باوجود شاہی حکومت، عوامی تحریک کو خاموش نہیں کرسکی ہے،انقلابیوں کو کچلنے کے آل خلیفہ حکومت کے اقدامات کا حکومت کے حق میں کوئی نتیجہ نہیں نکلے گا اور آزادی و حکومت کی تبدیلی تک تحریک بدستور جاری رہے گی، النجبا موومنٹ کے سکریٹری جنرل شیخ اکرم الکعبی نے بنی امیہ جیسے جابرانہ خاندانوں کے خلاف عوام کی تاریخی مزاحمت کا ذکر کرتے ہوئے اس اعتماد کا اظہار کیا کہ یہ قوم وقت کے ظلم و ستم کا مقابلہ کرنے سے پیچھے نہیں ہٹے گی، بحرین اس وقت کے ظالموں اور وہابی حکومت کا حصہ بننے والے ڈاکووں کے خلاف مستحکم رہے گا اور وہ دن بھی آئے گا جب شہدا کے پاکیزہ خون کی بدولت یہ ملک آزاد ہو جائے گا، 14 فروری اتحاد نے مناما پرمسلط خاندانی ڈکٹیٹر حکومت کو اکھاڑ پھینکنے او رسیاسی نظام میں بنیادی تبدیلی لانے کیلئے عوام اور تمام گروہوں سے اتحاد کی اپیل کی