دنیا بھر میں مسلمان اجتماعات سے گریز کریں،ماہ رمضان میں نماز گھر ہی میں ادا کریں،علماء کونسل سعودی عرب

مسجد نبوی اور مسجد الحرام میں اعتکاف اور افطار پر پابندی،دونوں مساجد میں نماز تراویح کو 20کے بجائے 10رکعتوں تک محدود کردیا گیا عام افراد پر پابندی، مساجد کی انتظامیہ اور خادمین شریک ہوں گے، دونوں مقدس مقامات پر افطار دستر خوان پر پابندی عائد رہے گی
ریاض (نیوز ڈیسک) مسجد نبوی اور مسجد الحرام میں اعتکاف اور افطار دستر خوان پر پابندی عائد کردی گئی جبکہ نماز تراویح کو 20کے بجائے 10رکعتوں تک محدود کردیا گیا، جس میں مساجد کی انتظامیہ اور خادمین شریک ہوں گے،دونوں مساجد کے نگران ادارے کے سربراہ اور امام کعبہ شیخ عبدالرحمان السدیس نے ایک بیان میں کہی، بیان کے مطابق لوگوں کے دونوں مساجد میں نماز اور تراویح پڑھنے پر پابندی رہے گی جبکہ عمرہ کی ادائیگی پر بھی پابندی برقرار رکھی گئی ہے، دونوں مقدس مقامات پر افطار دستر خوان پر پابندی عائد رہے گی، اس کے بجائے افطار ٹوکری تقسیم کی جائے گی، ادھر سینئر علما کی کونسل نے تمام مسلمانوں سے کہا ہے کہ اگر ان کے ممالک میں کورونا وائرس سے بچاو کیلئے سماجی فاصلے کی تجویز دی گئی ہے تو ماہِ رمضان کے دوران وہ گھر میں ہی نماز پڑھیں، مسلمان تمام اجتماعات سے گریز کریں کیونکہ یہ وائرس کے پھیلاو کی مرکزی وجہ ہیں، یاد رکھیں کہ لوگوں کی زندگیاں بچانا ایک عظیم عمل ہے جو آپ کو خدا کے قریب لاتا ہے۔