جو اہلبیتؑ سے دُور ہو گیا وہ اسلام سے دُور ہو گیا، پیر ہارون گیلانی

معروف اہلسنت عالم دین پیر ہارون گیلانی نے لاہور کی جامعہ عروۃ الوثقیٰ میں محرم الحرام کی مناسبت سے منعقدہ مجلس عزاء سے خطاب کرتے ہوئے کہا کہ وحدت اسلام کی بقاء کیلئے ضروری ہے۔ انہوں نے کہا کہ شیعہ سنی اختلافات صدیوں سے ہیں مگر ان سے زیادہ مشترکات ہیں جن پر امت کو متحد کیا جا سکتا ہے۔ پیر ہارون گیلانی کا کہنا تھا کہ اسلام کی اساس اور محافظت اہلبیتؑ کے گھرانے کے پاس ہے، جو اہلبیتؑ سے دور ہوگیا وہ اسلام سے دور ہوگیا، اگر اپنا اسلام بچانا ہے تو اہلبیت کے در پر آنا ہوگا۔ انہوں نے کہا کہ دشمن کی سازش ہے کہ شیعہ کو سنی سے اور سنی کو شیعہ سے لڑا کر پاکستان کو کمزور کرے، اس لئے ہمیں اس سازس کا ادراک کرتے ہوئے دشمن کے عزائم ناکام بنانا ہوں گے۔
پیر ہارون گیلانی نے علامہ سید جواد نقوی کی امت مسلمہ کے اتحاد کیلئے کوششوں کو بھی سراہا انہوں نے کہا کہ ہم علامہ سید جواد نقوی کی ان کوششوں اور کاوشوں میں ان کے شانہ بشانہ ہیں۔ انہوں نے کہا کہ علماء و مشائخ اس حوالے سے اہم کردار ادا کر سکتے ہیں، ہمارا ملک فرقہ واریت کا متحمل نہیں ہو سکتا، اس لئے کوئی بھی آپ کے درمیان انتشار پیدا کرے، اسے مسترد کر دیں اور اسے اپنی صفوں سے نکال باہر کریں۔