Ilyas 
ولی امر مسلمین آیت اللہ سید علی خامنہ ای نے بانی انقلاب اسلامی حضرت امام خمینی ؒکے مزاراوردیگرشہداکی قبور پر حاضری دی اور فاتحہ خوانی کی
آرٹس کونسل آف پاکستان کراچی میںیران کی ثقافتی نمائش منعقد، اس طرح کے پروگرام دونوں ہمسایہ ممالک کے دوستانہ تعلقات کو مضبوط بنانے میں اہم کردار ادا کر سکتے ہیں،فاطمہ حسن
تہران/کراچی(نیوز ڈیسک)انقلاب اسلامی کے بانی امام خمینیؒ کی وطن واپسی کے تاریخ ساز دن کے موقع پر ایران میں اسلامی انقلاب کی بیالیسویں سالگرہ کی دس روزہ تقریبات کا باضابطہ آغاز ہوگیا ہے۔اس مناسبت سے ولی امر مسلمین آیت اللہ سید علی خامنہ ای نے بانی انقلاب اسلامی حضرت امام خمینی ؒکے مزار پر حاضری دی اور فاتحہ خوانی کی ،وہ آیت اللہ بہشتی، شہید صدر محمد علی رجائی اور شہید وزیراعظم جواد باہنر اور دیگر شہدائے انقلاب کی قبور پر تشریف لے گئے اور شہدا کے درجات کی بلندی کی دعا کی،اس کے بعد رہبر انقلاب اسلامی ،گلزار شہدا قبرستان پہنچے اور ایران و اسلام کے مدافعین کی ارواح طیبہ کے لئے فاتحہ خوانی کی۔پاکستان میں بھی آرٹس کونسل آف پاکستان کراچی اور خانہ فرہنگ اسلامی جمہوریہ ایران کے اشتراک سے انقلاب اسلامی ایران کی بیالیسویں سالگرہ کی مناسب سے ایران کی ثقافتی نمائش کا انعقاد کیاگیا۔جس میں ایران کی ثقافت کی مناسبت سے فلم شو،کتابیں ،تصاویر اور دستکاریوں کی نمائش کی گئی۔اس موقع پر کراچی آرٹ کونسل کی ممبر محترمہ ‘فاطمہ حسن’نے اسلامی انقلاب کی کامیابی کی 42 ویں سالگرہ پر ایرانی عوام کو مبارکباد پیش کرتے ہوئے کہا کہ اس طرح کے پروگرام دونوں ہمسایہ ممالک کے مابین دوستانہ تعلقات کو مضبوط بنانے میں اہم کردار ادا کر سکتے ہیں۔کراچی میں تعینات ایرانی قونصل جنرل احمد محمدی نے کہا کہ دانشوروں اور ممتاز شخصیات کے اجتماع میں شرکت کرنا ہمارے لئے اعزاز کی بات ہے۔واضح رہے کہ امام خمینی ؒ 42 سال قبل تقریباپندرہ سال جلا وطنی کی زندگی گزارنے کے بعد ایران واپس تشریف لائے جہاں لاکھوں ایرانی عوام نے آپ کا فقیدالمثال اور تاریخی استقبال کیا، اس تاریخی آمد کے ساتھ ہی اسلامی انقلاب کی کامیابی کا راستہ ہموار ہو گیااورآپ کی وطن واپسی کے محض دس روز بعد ایران کا عظیم اسلامی انقلاب کامیابی سے ہمکنار ہوا ،اسی بات کو مد نظر رکھتے ہوئے ہرسال ان ایام میں "عشرہ فجر” کے نام سے اسلامی انقلاب ایران کی سالگرہ کی دس روزہ تقریبات کا انعقاد کیا جاتا ہے تاہم اس سال کورونا وائرس کی وجہ سے طبی اصولوں کو مد نظر رکھ کر تقریبات منعقد کی جارہی ہیں۔
