امریکا ذلیل ہوکراور منہ کی کھا کر یمن سے بھی نکلے گا،ایران

امریکا اور اتحادی ممالک نے جارح اتحاد کے جنگی جرائم پر آنکھیں بند کر رکھی ہیں
تہران(نیوز ڈیسک) ایرانی وزارت خارجہ نے یمن پر عرب اتحاد کے حملوں کی مذمت کرتے ہوئے کہا ہے کہ امریکا، یمن میں ایک اور شکست کا مزہ چکھے گا اور منہ کی کھا کر یمن سے بھی نکلے گا، جنگ یمن کے پانچ سال پورے ہونے پر ایک بیان میں ایرانی وزارت خارجہ کے ترجمان نے کہا کہ یمن پر فوجی جارحیت ایسی حالت میں جاری ہے کہ امریکا اور کچھ دیگر ممالک نے نہ صرف یہ کہ جارح اتحاد کے جنگی جرائم پر اپنی آنکھیں بند کر رکھی ہیں بلکہ بدستور ہتھیاروں کو فروخت کرکے، اطلاعات کے تبادلے اور جارح قوتوں کی حمایت کرکے ان جرائم میں شریک ہیں اور ان کو اس کا جواب دینا ہوگا، وزارت خارجہ نے کہا کہ امریکا نے ثابت کر دیا ہے کہ علاقے کے جس ملک میں بھی اس کی موجودگی ہوئی وہاں نا امنی اور اس ملک کے سرمایہ کی لوٹ پاٹ کے علاوہ کوئی نتیجہ برآمد نہیں ہوا۔