اربعین پر اپنے گھروں سے نکل کر حسینی ہونے کا ثبوت دیں، علامہ عبدالخالق اسدی

مجلس وحدت مسلمین پنجاب کے سیکریٹری جنرل علامہ عبدالخالق اسدی نے لاہور میں اپنے خصوصی پیغام میں کہا ہے کہ محرم الحرم جب بھی آتا ہے اِس مردہ معاشرے میں نئی روح پھونک کر جاتا ہے اور ساتھ ساتھ اربعین حسینی دنیا بھر میں ہر سال پہلے برسوں سے بہتر انداز میں منعقد ہو رہا ہے۔ انہوں نے کہا کہ چند برسوں سے اربعین حسینی ایک عالمی موضوع بن گیا ہے، اس سال پاکستان کے علمائے کرام نے حکم دیا ہے کہ اس سال اربعین پہلے سے زیادہ پُرجوش انداز میں منایا جائے تاکہ یزیدی فکر کو فروغ دینے والوں اور فرقہ واریت کو ہوا دینے والوں کو پیغام جائے کہ حسینی متحد اور بیدار ہیں۔
علامہ اسدی نے کہا کہ اس سال شیعہ اور سنی مل کر اس چہلم کو منعقد کر رہے ہیں، بیرونی سازشوں کو ناکام بنانے کیلئے گھروں سے نکلیں اور 20 صفر کے جلوسوں کو اپنے وجود سے رونق بخشیں اور اپنی ذمہ داری ادا کریں۔ انہوں نے کہا کہ موجودہ دور میں واضح ہو چکا ہے کہ دو ہی گروہ ہیں، ایک حسینی(ع) اور دوسرا یزیدی، جو جو حسینی(ع) ہے اور اپنی وابستگی نواسہ رسول(ص) حضرت امام حسین علیہ السلام سے رکھتا ہے وہ یزیدی قوتوں کیخلاف 20 صفرالمظفر کو میدان عمل میں نکلے۔ انہوں نے کہا کہ 20 صفر کو گھروں سے نکل کر حسینی ہونے کا ثبوت دیں۔