صیہونی فورسز کا مسجد اقصیٰ پر دھاوا، نمازیوں پر بدترین تشدد، خواتین سمیت 60 فلسطینی زخمی

مقبوضہ بیت المقدس: اسرائیلی پولیس نے ایک بار پھر مسجد اقصیٰ پر دھاوا بول دیا۔ صیہونی فورسز مسجد اقصیٰ کا تقدس پامال کرتے ہوئے احاطے میں گھس گئی اور نمازیوں کو بدترین تشدد کا نشانہ بنایا۔ خواتین سمیت 60 سے زائد نمازی زخمی ہوگئے۔ پولیس نے نہتے نمازیوں پر گرینیڈ پھینکے اور آنسو گیس کی شیلنگ کی جس سے متعدد نمازیوں کی حالت غیر ہوگئی۔ فوجیوں نے ہلال احمر کی ایمبولینسوں پر بھی حملہ کیا اور انہیں ان علاقوں تک پہنچنے سے روک دیا جہاں متعدد افراد کو طبی امداد کی ضرورت تھی۔ اسرائیلی پولیس کے مسجد اقصیٰ میں گھسنے کی خبر سنتے ہی سینکڑوں فلسطینی مرد اور خواتین مسجد اقصیٰ پہنچ گئے اور اسرائیلی پولیس کی دہشتگردی کے خلاف شدید احتجاج کیا۔ اسرائیلی پولیس نے خواتین سمیت چار سو سے زائد مظاہرین کو گرفتار بھی کرلیا۔