Raza Musani 
تل ابیب : صیہونی فوج کا تین ماہ میں غزہ کی تقسیم، قبضے اور رفح ماڈل نافذ کرنے کا منصوبہ سامنے آگیا۔ اسرائیلی اخبار اسرائیل ہیوم کے مطابق تین ماہ کے اندر غزہ کے زیادہ تر علاقے پر کنٹرول کرنے کے منصوبے کو تطہیر کا نام دیا گیاہے۔ قبضے کے بعد کلیئرنگ آپریشن کئی ماہ جاری رہے گا۔ اس کارروائی میں پانچ فوجی دستے حصہ لیں گے جن میں چار حملہ آور اور ایک دفاعی دستہ ہے۔ اس کے ساتھ ساتھ یرغمالیوں کی ممکنہ رہائی کی کسی متوقع ڈیل کی صورت میں کارروائی روکنے کی گنجائش بھی رکھی گئی ہے۔ رپورٹ کے مطابق صیہونی فوج ہر اس علاقے میں رفح ماڈل کو نافذ کرنے کا ارادہ رکھتی ہے جہاں وہ پہنچے گی۔ رپورٹ کے مطابق منصوبے کےتحت غزہ کی آبادی کو شمالی پٹی سے وسطی اور جنوبی علاقوں کی طرف دھکیل دیا جائے گا جس کیلئے امدادی مراکز صرف جنوب اور وسطیٰ علاقوں میں کام کریں۔ توقع ہے کہ یہ مراکز ہفتے کے آخر یا اتوار تک کام کرنا شروع کر دیں گے۔
