Raza Musani 
کابل : افغانستان کے دارالحکومت کابل میں خواتین نے روٹی، کام، آزادی کے نعرے لگاتے ہوئے طالبان کی جانب سے عائد سخت پابندیوں کے خلاف احتجاج کیا۔ وزارت تعلیم کے سامنے 20 سے زیادہ خواتین جمع ہوئیں اور طالبان حکام سے خواتین کے لیے تعلیم اور روزگار کا مطالبہ کیا۔ مظاہرہ ختم کرنے سے قبل خواتین نے چند سو میٹر مارچ کیا کیونکہ طالبان نے سادہ لباس میں جنگجوؤں کو تعینات کیا تھا۔ طالبان نے خواتین کو اعلامیہ پڑھنے کی اجازت نہیں دی اور کچھ لڑکیوں سے موبائل فونز بھی چھین لیے اور احتجاج کی تصویریں اور ویڈیوز بنانے سے بھی روکا۔ اگست میں اقتدار پر قبضہ کرنے کے بعد طالبان نے خواتین کو سرکاری اداروں میں کام سے روکنے اور لڑکیوں کے اسکول جانے پر پابندی عائد کی تھی۔
