اسلحے کا غیر معمولی پھیلاؤ، امریکا قتل، دہشت گردی اور تشدد کی آماجگاہ بن گیا

واشنگٹن : اسلحہ کے غیر معمولی پھیلاؤ نے امریکا کو تشدد کی آماجگاہ بنادیا۔ امریکی محکمہ انصاف کی رپورٹ کے مطابق 2000 کے بعد کمرشل مارکیٹ کیلئے 13 کروڑ 90 لاکھ بندوقیں تیار کی گئی ہیں جن میں ایک کروڑ 13 لاکھ صرف سال 2020 میں تیار ہوئیں۔ اسی عرصے میں 7 کروڑ 10 لاکھ مزید بندوقیں درآمد کی گئیں جس کے بعد ملک تشدد، خودکشی اور قتل جیسے واقعات کی آماجگاہ بن گیا۔ قتل کے اکثر واقعات میں امریکیوں نے آسانی سے چلنے والی سیمی آٹومیٹنگ اسالٹ رائفلوں کا استعمال کیا جو انہیں مارکیٹ سے انتہائی کم قیمت پر میسر آئیں۔ کچھ لوگوں نے سیمی آٹومیٹک نائن ایم ایم پستول بھی استعمال کیے جو زیادہ تر پولیس کے استعمال میں ہوتے ہیں۔سینٹرز آف ڈیزیز کنٹرول اینڈ پروینٹیشن نے بتایا تھا کہ امریکا میں اسلحے کے ذریعے قتل کے واقعات میں 2020 میں بڑا اضافہ دیکھا گیا تھا۔ اس سال قتل کے ایسے 19 ہزار 350 واقعات پیش آئے جو 2019 کے مقابلے میں 35 فیصد زیادہ تھے۔ اسلحے کے ذریعے خودکشی کے 24 ہزار 245 واقعات پیش آئے جو 2019 کی نسبت ڈیڑھ فیصد زیادہ تھے۔امریکا میں 2000 میں سالانہ 39 لاکھ کمرشل استعمال کی بندوقیں تیار ہوتی تھیں جن کی تعداد 20 برس میں بڑھ کر ایک کروڑ 13 تک پہنچ گئی۔ صرف 2020 میں ساڑھے 55 لاکھ پستول اور10لاکھ ریوالور تیار کیے گئے۔محکمہ انصاف کی رپورٹ کے مطابق سال 2021 میں حکام نے 19 ہزار 244 ایسی بندوقیں ضبط کیں جبکہ گزشتہ پانچ برسوں میں صرف ایک ہزار 758 بندوقیں قبضے میں لی گئیں تھیں۔