حماس کا نیا سربراہ کون ہوگا؟ انتخاب آخری مرحلے میں داخل

دوحہ : حماس اپنے نئے سربراہ کے انتخاب کے آخری مرحلے میں داخل ہو گئی ہے، جہاں دو اہم رہنما خالد مشعل اور خلیل الحیہ اس عہدے کے لیے مقابلہ کر رہے ہیں۔
حماس اپنے سیاسی دفتر کے سربراہ کے چناؤ کے لیے اندرونی انتخابات کے آخری مرحلے میں داخل ہو گئی ہے۔ مقابلہ دو سینئر رہنماؤں خلیل الحیہ اور خالد مشعل کے درمیان محدود ہو گیا ہے۔ حماس کے ایک عہدیدار نے بتایا کہ تینوں علاقائی حلقوں میں انتخابی عمل مکمل ہو چکا ہے اور حتمی مرحلہ جاری ہے، جبکہ نئے سربراہ کا اعلان ماہ رمضان میں ہی کیا جائے گا ۔ ذرائع کے مطابق آئندہ سربراہ ایک غیرمعمولی انتخابی دور کے تحت ایک سال کے لیے سیاسی دفتر کی قیادت کریں گے، جس کے بعد چار سالہ مدت کے لیے نئے انتخابات متوقع ہیں۔ حماس کے مطابق یہ انتخابات اندرونی قانونی جواز کی تجدید اور اسرائیل کے ہاتھوں سیاسی بیورو، شوریٰ کونسل اور عسکری قیادت کے درجنوں ارکان کی شہادت کے بعد خالی آسامیوں کو پُر کرنے کے لیے ہو رہے ہیں۔ نئے سربراہ کو امریکا اور اسرائیلی حکام کی جانب سے حماس کو غیر مسلح کرنے کے مطالبات کا سامنا ہوگا، جبکہ حماس کا عسکری ونگ ہتھیار ترک کرنے کو مسترد کرتا ہے۔