ایران کے ساتھ جنگ نئے مرحلے میں داخل ہوگئی، جے ڈی وینس

واشنگٹن: امریکی نائب صدر جے ڈی وینس نے کہا ہے کہ ایران کے ساتھ جنگ نئے مرحلے میں داخل ہوچکی ہے، جس میں واشنگٹن اقتصادی دباؤ کو اہم ہتھیار کے طور پر استعمال کر رہا ہے۔ جے ڈی وینس نے کہا کہ ایران پر اقتصادی دباؤ ڈالنا واشنگٹن کے پاس موجود سب سے مؤثر ذریعہ ہے۔ اس صورتحال نے ایران کا دباؤ بڑھانے کا اختیار کم اور اس کی معیشت پر دباؤ زیادہ کردیا ہے۔ جے ڈی وینس نے تسلیم کیاکہ ایران امریکی اقتصادی دباؤ کا مقابلہ چند ہفتوں، چند ماہ یا اس سے بھی زیادہ عرصے تک کر سکتا ہے۔ انہوں نے کہا کہ واشنگٹن کی اولین ترجیح ایران کو جوہری ہتھیار کے حصول سے روکنا ہے۔ امریکی نائب صدر نے کہا کہ واشنگٹن اقتصادی دباؤ جاری رکھے گا کیونکہ وہ اسے اپنے حتمی مقصد کے حصول کا بہترین طریقہ سمجھتا ہے۔
ادھر وزیر خزانہ اسکاٹ بیسنٹ نے ایران کے خلاف سخت ترین پابندیاں عائد کرنے کا اعلان کرتے ہوئے کہا ہے کہ تہران کے ساتھ کاروبار جاری رکھنے والے ممالک کے خلاف بھی امریکی اقدامات نافذ کیے جائیں گے۔