Raza Musani 
واشنگٹن : امریکا نے عراق کو خبردار کیا ہے کہ اگر اگلی حکومت میں ایرانی حمایت یافتہ ملیشیاؤں کے ارکان شامل کیے گئے تو وہ عراقی تیل کی فروخت سے حاصل ہونے والا منافع منجمد کردےگا۔ رپورٹس کے مطابق امریکا آئندہ حکومت میں ایران کے حامی ارکان کو شامل نہ کرنے کے لیے دباؤ بڑھا رہا ہے۔ فنانشل ٹائمز نے سب سے پہلے بغداد کو اس کے ڈالر کے ذخائر سے سپلائی روکنے کی دھمکی کی اطلاع دی تھی۔
رائٹرز نے رپورٹ کیا کہ بغداد میں امریکی ناظم الامور جوشوا ہیرس نے یہ انتباہات عراقی اہلکاروں اور اہم شیعہ رہنماؤں کو بذات خود اور ثالث کے ذریعے پہنچائے۔امریکا کا موقف ہے کہ ایران سے منسلک ملیشیاؤں کی حکومت میں شمولیت مضبوط امریکا عراق شراکت داری کے ساتھ مطابقت نہیں رکھتی اور وہ عراق پر مزید دباؤ ڈالنے کے لیے اقتصادی حربے استعمال کرنے کو تیار ہے۔
