امریکا بھارت اعلامیہ، پاکستان کا امریکی سفارتکار کو طلب کرکے احتجاج

اسلام آباد: پاکستان نے ہندوستانی وزیراعظم نریندر مودی کےدورہ امریکا کے اعلامیہ میں گمراہ کن حوالوں پر امریکی سفارتکار کو طلب کرکے احتجاج ریکارڈ کرایا۔ ترجمان دفتر خارجہ کے مطابق امریکی ڈپٹی چیف آف مشن کو دفتر خارجہ طلب کر کے شدید تحفظات کا اظہار کیا گیا۔ اور مودی کے دورہ امریکا کے مشترکہ اعلامیہ میں پاکستان کے خلاف من گھڑت اور بے بنیاد بیانیے پر شدید تحفظات کا اظہارکیا گیا۔ ترجمان نے کہا کہ امریکا، پاکستان کے خلاف ہندوستان کے بےبنیاد بیانیے پر متنازع بیانات جاری کرنے سے گریز کرے اور پاکستان کے خلاف ہندوستان کے سیاسی بیانیے کی حوصلہ افزائی سمجھے جانے والے بیانات سے گریز کرے۔ ترجمان دفترخارجہ نے کہا کہ پاکستان اور امریکا کے درمیان انسداد دہشت گردی میں تعاون بہتر طور پر آگے بڑھ رہا ہے۔ پاک امریکا اعتماد اور افہام و تفہیم دو طرفہ تعلقات کو مزید مستحکم کرنے کے لیے ناگزیر ہے۔ادھر امریکی محکمہ خارجہ کے ترجمان میتھیو ملر نے دہشت گردی کے خاتمے کے لیے پاکستان کی کوششوں سراہا اور کہا کہ پاکستان لشکر طیبہ سمیت دیگر تنظیموں کو ختم کرنے کا کام جاری رکھے۔