امریکا اور اسرائیل کے ایران کے شہری اہداف پر حملے

تہران : امریکی صدر ٹرمپ کی دھمکی کے بعد امریکا اور اسرائیل نے ایران کے شہری اہداف پر حملے تیز کردئے۔ اسرائیل اور امریکا کے حملے میں تہران میں قدیم ترین طبی تحقیقاتی مرکز پاسچر انسٹی ٹیوٹ آف ایران کی عمارت کو بمباری سے شدید نقصان پہنچا۔ وزارت صحت نے اسے عالمی صحت کے صدی پرانے ستون پر براہِ راست حملہ قرار دیا ہے۔ بمباری کرکے کرج شہر اور تہران کو ملانے والی ہائی وے برج کو اڑا دیا گیا۔ یہ مشرق وسطیٰ کا سب سے بلند پل ہے۔ حملے میں دو افراد شہید اور کئی افراد زخمی ہوگئے۔
کرج میں کئی دیگر مقامات پر بھی حملے کئے گئے۔ اسرائیل اور امریکا نے مشہد ایئرپورٹ کے قریب ایندھن ذخیرہ کرنے کے ٹینکس اور ایک گودام پر حملے کئے۔ اصفہان کے مضافات میں ایران کے بڑے میزائل اڈے کو نشانہ بنایا گیا۔ میزائل بیس کے قریب آسمان میں دھویں کے بادل چھا گئے۔ ایران نے وعدہ صادق آپریشن کی نئی لہر میں امریکی اور اسرائیلی صنعتی و عسکری اہداف کو میزائلوں اور ڈرونز سے نشانہ بنایا۔