ایران میں طبی مراکز اور رہائشی علاقوں پر حملوں میں مزید 22 افراد شہید ، تعداد 1332 ہوگئی

تہران : ایران پر اسرائیلی حملوں میں مزید بائیس افراد شہید اور کئی زخمی ہوگئے۔ اسرائیل نے ایرانی دارالحکومت تہران۔ شیراز۔ اصفہان۔ لورستان اور دیگر علاقوں میں عسکری اور شہری تنصیبات کو نشانہ بنایا۔ شیراز کے زیبا شہر میں رہائشی علاقے پر حملے میں بیس افراد شہید اور کئی زخمی ہوگئے۔ طبی مرکز پر حملے میں دو پیرامیڈکس نشانہ بنے۔
لورستان میں بھی حملہ کیا گیا جس میں چھ افراد زخمی ہوئے۔ ایران پر حملوں میں شہید افراد کی تعداد 1332 ہوگئی ہے۔ امریکا نے 72 گھنٹوں میں ایران کے تقریباً دو سو اہداف پر حملے کئے۔ بی ٹو بمبار طیاروں نے بنکر بسٹر بم استعمال کیے۔
امریکی سینٹ کام نے دعویٰ کیا کہ آپریشن کے پہلے دن کے بعد ایرانی میزائل حملوں میں نوے فیصد کمی آگئی، کمانڈر ایڈمرل بریڈ کوپر کے مطابق اگلے مرحلے میں ایران کی میزائل پیداوار کو تباہ کرنے پر توجہ ہوگی۔
اسرائیلی فوج نے دعویٰ کیا ہے کہ حملوں میں چھ بیسلٹک میزائل لانچرز اور تین ایڈوانس ڈیفنس سسٹمز تباہ کردیے ہیں۔
ایرانی ہلال احمر کے مطابق امریکا اور اسرائیل نے اب تک 636 مقامات کو نشانہ بنایا۔ امریکی اور اسرائیلی حملوں میں اب تک 21 امدادی وطبی مراکز کو شدید نقصان پہنچا، 24 اسپتالوں کو بھی نقصان پہنچا جبکہ 3 ہزار 90 رہائشی مکانات تباہ یا شدید متاثر ہوئے۔ ایرانی ہلال احمر کے مطابق فضائی حملوں میں 528 تجارتی مراکز اور سروس سینٹرز بھی متاثر ہوئے۔ ایرانی ہلال احمر کے 9 مراکز بھی امریکی اور اسرائیلی حملوں کی زد میں آئے۔