ٹرمپ کی گرفتاری و رہائی، 34 الزامات پر فرد جرم عائد

نیویارک :امریکا کے سابق صدر ڈونلڈ ٹرمپ کو 34 الزامات پر مشتمل فردجرم عائد کرکے رہا کردیا گیا۔ ڈونلڈ ٹرمپ نیو یارک کی مقامی عدالت میں پیش ہوئے جہاں انہیں گرفتار کرلیا گیا۔ عدالت میں ان پر 34 الزامات عائد کئےگئے۔ انہوں نے صحت جرم سے انکار کیا۔ایک گھنٹے کی عدالتی کارروائی کے دوران سابق صدر خاموش اور چہرے پر بغیر تاثرات کے بیٹھے رہے۔ جج کے دریافت کرنے پر ٹرمپ اونچی آواز میں بولے میں بے قصور ہوں۔ عدالتی کارروائی کے بعد انھیں رہا کر دیا گیا اور وہ اپنے نجی طیارے پر فلوریڈا روانہ ہوگئے۔ جہاں انہوں نے اپنے حامیوں سےخطاب کرتے ہوئے کہاکہ یہ کیس ان کی صدارتی انتخاب کی مہم کو نقصان پہنچانے کے لیے بنایا گیا ہے۔ میں نے صرف ایک جرم کیا ہے وہ ہے بے خوفی سے اپنی قوم کا دفاع کرنا۔ ہمارا ملک جہنم میں جا رہا ہے۔ امریکی تاریخ میں کسی بھی موجودہ یا سابق صدر کے خلاف یہ پہلی مجرمانہ کارروائی ہے۔