Raza Musani 
تہران: ایران کی سپریم نیشنل سکیورٹی کونسل کے سیکریٹری علی لاریجانی نے کہاہے کہ امریکی صدر نے ہمارے رہبر معظم اور ایک ہزار سے زائد لوگوں کو شہید کیا، یہ کوئی معمولی بات نہیں ہے۔ ہم اسے نہیں چھوڑیں گے۔ اسے اپنے کیے کی قیمت ادا کرنا ہوگی۔ایرانی سرکاری ٹی وی کو دیے گئے انٹرویو میں علی لاریجانی نے کہا کہ ایران اس وقت تک ٹرمپ کو نہیں چھوڑے گا جب تک اس کارروائی کا جواب نہ دے دیا جائے۔ لاریجانی نے خطے کے ممالک کو خبردار کیا کہ اگر ان کی سرزمین ایران کے خلاف حملوں کے لیے استعمال ہوئی تو تہران جواب دینے کا حق محفوظ رکھتا ہے۔ ان کا کہنا تھا کہ اگر علاقائی ممالک امریکا کو اپنی سرزمین استعمال کرنے سے روک دیں تو ایران کو ان سے کوئی مسئلہ نہیں ہوگا۔
علی لاریجانی نے ایکس پر جاری بیان میں دعویٰ کیا کہ متعدد امریکی فوجیوں کو ایران کی افواج نے قیدی بنا لیا ہے۔ جبکہ امریکی انتظامیہ دعویٰ کر رہی ہے کہ وہ لڑائی کے دوران مارے گئے ہیں۔ امریکا اسے زیادہ دیر چھپا نہیں سکے گا۔ علی لاریجانی نے کہا ایران پر حملے کرکے ٹرمپ اپنے مقاصد حاصل کرنے میں ناکام رہا۔ امریکا اپنے غلط اندازوں کے دلدل میں پھنس چکا ہے۔
