اسرائیلی جارحیت سے مقابلے کیلئے اسلامی ممالک میں اتحاد اور یکجہتی کی ضرورت ہے، ایران، ترکیہ متفق

تہران : ایران کے صدر آیت اللہ سید ابراہیم رئیسی نے ترکی کے صدر رجب طیب اردوان کے ساتھ ٹیلیفونک گفتگو میں کہا کہ فلسطین پر غاصب صیہونی حکومت کی جارحیت کا مقابلہ کرنے کے لئے اسلامی ممالک کے درمیان اتحاد اور یکجہتی کی ضرورت ہے۔ انہوں نے مسجد اقصیٰ میں نمازیوں کے خلاف صیہونی حملوں کے بارے میں ردعمل ظاہر کرتے ہوئے تجویز دی کہ صیہونی حکومت کے خلاف مشترکہ لائحہ عمل طے کرنے کے لئے او آئی سی کا اجلاس بلایا جائے۔ صدر رئیسی نے لبنان اور شام پر اسرائیلی حملوں کی شدید مذمت کی اور خطے کے ممالک کی جغرافیائی سرحدوں کے احترام پر زور دیا ترکیہ کے صدر اردوان نے مسجد اقصیٰ اور فلسطینی عوام پر اسرائیلی حملوں کی مذمت کی اور جارح صیہونی ریاست کے خلاف او آئی سی کے پلیٹ فارم پر اسلامی ممالک کا مشترکہ موقف اپنانے پر زور دیا۔ انہوں نے ترکی میں آنے والے زلزلے کے متاثرین کی مدد کرنے پر ایران کا شکریہ ادا کیا۔ادھر ایرانی وزارت خارجہ کے ترجمان ناصر کنعانی نے لبنان اور غزہ پر حملوں کو مسجد الاقصی اور فلسطینی عوام پر صیہونی فوجیوں کی وحشیانہ جارحیت کا تسلسل قرار دیتے ہوئے کہا کہ صیہونی حکومت نے لبنان کے اقتدار اعلیٰ اور ارضی سالمیت اور فلسطینی عوام کو نشانہ بنا کر تمام عالمی قوانین اور انسانی حقوق کے اصولوں کو پاؤں تلے روند ڈالا ہے۔