صیہونی وزیر کا فلسطینی قوم کے وجود سے ہی انکار

تل ابیب : فلسطینی قصبے حوارا کو صفحہ ہستی سے مٹانے کا زہر آلود بیان دینے والے صیہونی وزیر نے فلسطینی قوم کے وجود سے ہی انکار کردیا۔ صیہونی وزیرخزانہ بیزلیل سموٹریچ نے پیرس میں ایک تقریب سے خطاب میں کہاکہ فلسطینی عوام کا تصور مصنوعی ہے۔فلسطینی قوم نام کی کوئی شئے وجود نہیں رکھتی۔ فلسطین کی کوئی تاریخ ہے نہ ہی ان کی کوئی زبان ہے۔ بیزلیل سموٹریچ نے گذشتہ ماہ کہا تھا کہ مغربی کنارے کے قصبے حوارا کو صفحہ ہستی سے مٹادیا جائے۔ فلسطینی وزیر اعظم محمد شطیہ نےکہا کہ صیہونی وزیر کا بیان انتہا پسند، نسل پرست صہیونی نظریے کا حتمی ثبوت ہیں جو موجودہ اسرائیلی حکومت کی جماعتوں پرغالب ہے۔ یہ اشتعال انگیز بیانات لوگوں کے بغیر سرزمین کے پہلے صیہونی دعووں سے مطابقت رکھتے ہیں۔