صیہونی فوج کی غزہ پر ایک بار پھر جارحانہ کارروائی کی دھمکی

تل ابیب : صیہونی فوج نے غزہ کو غیر مسلح کرنے کیلئے ایک بار پھر جارحانہ کارروائی کی دھمکی دیدی۔ اسرائیلی آرمی چیف ایال ضمیر نے کہا کہ حماس کے ہتھیار ختم کرنے کے جنگی ہدف پر کوئی سمجھوتہ نہیں کریں گے۔ اسرائیلی فوج کے سربراہ لیفٹیننٹ جنرل ایال ضمیر نے جنوبی غزہ کے علاقے رفح کے دورے کے موقع پر کہا کہ فوج حماس کو غیر مسلح کرنے اور غزہ پٹی کی مکمل عسکری صفائی کے اپنے مقصد سے پیچھے نہیں ہٹے گی۔ ایال ضمیر نے کہا کہ ہمارے پاس فوجی فیصلے کے منصوبے موجود ہیں اور جب بھی ضرورت پڑی ہم جارحانہ کارروائی کے لیے تیار ہیں۔ انہوں نے زور دے کر کہا کہ جو غزہ پر لاگو ہوتا ہے وہی باقی علاقوں پر بھی لاگو ہوتا ہے۔ایال ضمیر نے کہا کہ جنگ کے دوران حماس کے تمام فرنٹ لائن بٹالیوں کو تباہ کر دیا گیا اور تمام یرغمالی واپس لوٹ آئے۔انہوں نے وضاحت کی کہ فوج سیاسی قیادت کی ہدایات کے مطابق کام کر رہی ہے مگر جارحانہ کارروائی کے لیے مکمل عسکری منصوبے تیار ہیں۔