Raza Musani 
یمن جنگ کو سات سال مکمل ہوگئے اور یہ آٹھویں سال میں داخل ہوگئی ہے۔ ایران نے کہا ہے کہ یمن کا بحران صرف یمنی گروہوں کے ذریعے اور سیاسی طریقے سے ہی حل ہوسکتا ہے۔ ایران کی وزارت خارجہ نے سعودی قیادت میں فوجی جارحیت کی برسی کے موقع پر جاری بیان میں یمن میں انسانی تباہی پر تشویش کا اظہار کیا ہے۔ وزارت خارجہ نے کہا کہ ظالم اتحاد کی جانب سے یمنی عوام کے خلاف تباہ کن جنگ اور وحشیانہ جارحیت اور ظالمانہ محاصرہ ایسی حالت میں آٹھویں سال میں داخل ہو رہا ہے کہ اس ملک کو صدی کے سب سے بڑے انسانی المیے کا سامنا ہے اور اس جنگ کے براہ راست یا بالواسطہ اثرات عام شہریوں منجملہ بے گناہ بچوں اور عورتوں پرمرتب ہوئے ہیں اور ساتھ ہی یمن کی حیاتی بنیادی تنصیبات ، اسپتالوں اور تعلیمی اداروں کی عمارتوں نیز اقتصادی مراکز کو جارح سعودی اتحاد نے پوری طرح تباہ کردیا ہے۔ بیان میں کہا گیا ہے کہ 7 برسوں کے دوران جارح سعودی اتحاد نے صرف بمباری و میزائل حملوں پر ہی اکتفا نہیں کیا بلکہ یمن کا غیر قانونی و غیر انسانی محاصرہ کر کے یمنی عوام پر بد ترین اقتصادی بحران، جنگ اور شدید ترین محاصرہ مسلط کیا گیا اور بری، بحری اور فضائی محاصرہ کر کے غذائی اشیا اور دواؤں تک سے اس ملک کو محروم رکھا گیا ہے جبکہ ضروریات زںدگی کے وسائل تک سے یمنی عوام محروم رہے ہیں۔ بیان میں مزید کہا گیا ہے کہ سعودی اتحاد میں شامل جارح ملکوں کو یورپ و امریکہ کی جانب سے جدید ترین ہتھیار فروخت کر کے ستم ظریفی کا مظاہرہ کیا گیا اور یورپ و امریکہ نے بین الاقوامی اداروں منجملہ اقوام متحدہ میں جانبداری کا مظاہرہ کر کے دوہرے معیار کا بھی ثبوت پیش کیا ہے جس سے انسانی حقوق کی پامالی کے ساتھ ساتھ بین الاقوامی قوانین کی دھجیاں تک اڑادی گئی ہیں۔
