امریکی سینیٹ میں اعلان جنگ کا اختیار صدر سے واپس کانگریس کو دینے کا بل منظور

واشنگٹن : امریکی سینیٹ نے بیرون ملک فوجی طاقت کے استعمال سے متعلق قانون منسوخ کرنے کی منظوری دیدی۔ امریکی آئین کے تحت صرف کانگریس کو جنگ کا اعلان کرنے کا اختیار حاصل ہے۔ لیکن 20 سال پہلے عراق پر حملے کیلئے کانگریس نے یہ اختیار امریکی صدر کو سونپ دیا تھا۔ امریکی سینیٹ میں بیس سال پرانے اس قانون کی تنسیخ کیلئے ووٹنگ ہوئی ۔ بل کی حمایت میں 66 جبکہ مخالفت میں 30 ووٹ پڑے۔ 15 ری پبلکن ارکان نے بھی بل کے حق میں ووٹ دیا۔ اختیارات کی تنسیخ کیلئے 51 ووٹوں کی ضرورت تھی۔ بل کی منظوری سے جنگ شروع کرنے یا بیرون ملک لڑائی کیلئے فوج بھیجنے کا کانگریس کا اختیار بحال ہوجائے گا لیکن ایوان نمائندگان میں اس بل کی منظوری کے امکانات کم ہیں۔ کیونکہ وہاں ری پبلکن ارکان کی اکثریت ہے۔ جبکہ صدر جوبائیڈن یہ کہہ چکے ہیں کہ اگر یہ قانون ان کی میز تک پہنچ جاتا ہے تو وہ اس پر دستخط کردیں گے۔ مارچ 2003ء میں امریکا نے اپنے اتحادیوں کے ساتھ مل کر عراق پرحملہ کردیا تھا۔اس جنگ کے نتیجے میں لاکھوں عراقیوں اور ہزاروں امریکیوں کی جانیں گئی تھیں۔