اقوام متحدہ کو یمن میں ایک بار پھر جنگ چھڑنے کا خدشہ

مناما: اقوام متحدہ نے یمن میں ایک بار پھر جنگ چھڑنے کا خدشہ ظاہر کردیا۔ اقوام متحدہ کے خصوصی نمائندے گرنڈ برگ نے کہا کہ اسرائیل جنگ سے پیدا ہونے والے علاقائی بحران کی وجہ سے یمن میں امن کے روڈ میپ پر عملدرآمد کے امکانات تاخیر کا شکار ہیں تاہم فریقین سے بات چیت جاری ہے۔ انہوں نے خبردار کیا کہ جنگ زدہ عوام امن کے لیے کسی روڈ میپ کا زیادہ عرصہ انتظار نہیں کر سکتے کیونکہ یمن دوبارہ جنگ کی جانب جا سکتا ہے۔ انہوں نے کہا کہ ایسا بحران ہمیشہ کے لیے نہیں چل سکتا، ایک وقت آتا ہے جب فریقین کسی بہتر نتیجے کی توقع کرتے ہیں۔ انہوں نے کہا کہ یمن کی موجودہ صورتحال میں ملک کی دو تہائی آبادی امداد پر انحصار کرتی ہے اور انسانی المیے کی نمائندگی کر رہی ہے۔