دشمن کی حکمت عملی فریب، جھوٹ، لالچ اور حقائق مسخ کرنے پر مبنی ہے، ولی امر مسلمین

تہران: ولی امر مسلمین آیت اللہ العظمی سید علی خامنہ ای نے کہا ہے کہ دشمن کی حکمت عملی فریب، جھوٹ، لالچ، حقائق کو مسخ کرنے اور قوموں کی تذلیل پر مبنی ہے۔ دشمن قوموں کو ایک دوسرے کے بارے میں مایوسی کا شکار بنانے اور ان کی صلاحیتوں کو چھپانے کی کوشش کر رہا ہے۔ تہران میں مصلائے امام خمینی (رہ) میں نماز عید کے عظیم الشان اجتماع سے خطاب میں ولی امر مسلمین نے ایرانی قوم سے قومی اتحاد کو برقرار رکھنے کی تاکید کی اور کہاکہ دشمن نہیں چاہتا کہ قوم کا اتحاد قائم رہے۔ انہوں نے حکام پر زور دیا کہ وہ موجودہ مسائل اور خامیوں کو دورکرنےکے لیے مل کر کام کریں۔ ولی امر مسلمین نے ایران کی طاقت کی تین شاخوں(عدلیہ، مقننہ، انتظامیہ) کے سربراہوں کے درمیان مکمل تعاون کو ایک اہم اور بنیادی حکمت عملی قرار دیتے ہوئے اس بات پر زور دیا کہ حکام کو کبھی بھی ایک دوسرے کے راستے میں نہیں آنا چاہیے بلکہ اپنے منصوبوں کو عملی جامہ پہنانے میں آسانی پیدا کرنا چاہیے۔ انہوں نے ایرانی حکام پر زور دیا کہ وہ معمولی باتوں میں مشغول نہ ہوں، اور بنیادی طور پر اس بات پر توجہ مرکوز کریں کہ کس طرح نازک مسائل پر قابو پایا جائے۔