ملت فلسطین مسجد الاقصیٰ کو یہودیت کا رنگ نہیں دینے دے گی، خالد مشعل

غزہ : حماس کے سربراہ خالد مشعل نے کہا ہے کہ مسجد الاقصیٰ پوری طرح ایک اسلامی مقدس مقام ہے اور ملت فلسطین مسجدالاقصی کو یہودیت کا رنگ دینے ، اسے تقسیم کرنے ، اسے منہدم کرنے یا اس میں غاصبوں کی کسی طرح کی سیاسی و دینی حکمرانی نافذ کرنے کی اجازت نہیں دے گی۔ صیہونیوں کی سازشیں اب بھی جاری ہیں اور ہم ملت فلسطین کو خبردارکرنا چاہتے ہیں کہ جنگ ابھی ختم نہیں ہوئی ہے اور ہوسکتا ہے کہ صیہونی ، آئندہ کسی موقع پر پھر مسجدالاقصی پرحملہ کریں۔حماس کے سربراہ نے زور دے کر کہا کہ دشمن سمجھتا تھا کہ غرب اردن میں ہرطرح کی مسلح استقامت روک کر فلسطینیوں کی زمینیں ہڑپنے ، صیہونی کالونیاں تعمیرکرنے اور مسجدالاقصی پرقبضہ کرنے کی راہ ہموارکرلے گا۔ دشمن ماضی میں مسجدالاقصی کوزمان و مکان میں تقسیم کرکے اس میں یہودیوں کی دینی حکمرانی قائم کرنا چاہتا تھا۔حماس کے سربراہ نے کہا کہ غاصبوں نے جو اصطلاح رائج کی اور بعض یورپی سیاستداں بھی اسے استعمال کرنے لگے وہ یہ تھی کہ عبادت کے مقامات تک دسترس کی آزادی حاصل ہونا چاہئے جو ایک گمراہ کن اصطلاح ہے کیونکہ مسجدالاقصی پوری طرح ایک اسلامی مقام ہے اور اس پر صیہونیوں کا کوئی حق نہیں ہے۔